ລາຍລະອຽດການເປີດເຜີຍຂໍ້ມູນ

ບໍລິສັດ ຜະລິດ-ໄຟຟ້າລາວ ມະຫາຊົນ (“ບໍ​ລິ​ສັດ”) ຂໍຖືເປັນກຽດແຈ້ງມະຕິທີ່​ສຳຄັນ ຂອງກອງປະຊຸມສະພາບໍລິຫານສະໄໝວິສາມັນ ຄັ້ງທີ 3/2020 ວັນທີ 14 ກໍລະກົດ 2020, ມີລາຍລະອຽດລຸ່ມນີ້:

1. ຮັບຮອງການ​​ແຕ່ງຕັ້ງຜູ້ອຳນວຍການ​ໃຫຍ່ຜູ້​ໃໝ່ ພ້ອມ​ດ້ວຍ​ຄະນະ ​ເພື່ອ​ປ່ຽນ​ແທນ​ຜູ້ອຳນວຍການ​ໃຫຍ່​ຜູ້​ເກົ່າ ພ້ອມດ້ວຍ​ຄະນະທີ່​ເຂົ້າຮັບກະສຽນບໍາເນັດຄື:

                             1) ຮັບຮອງການແຕ່ງ​ຕັ້ງ ທ່ານ ດວງ​ສີ ພາຣະຍົກ ເປັນ​ຜູ້ອຳນວຍການໃຫຍ່​ຜູ້​ໃໝ່ ​ເພື່ອສືບ​ຕໍ່ປະຕິບັດ​ໜ້າ​ທີ່​ບໍລິຫານບໍລິສັດ​ ແທນຜູ້ອໍານວຍ​ການໃຫຍ່ຜູ້​ເກົ່າ;

                             2) ຮັບຮອງການແຕ່ງ​ຕັ້ງ ທ່ານ ທອງ​ເພັດ ດ້ວງ​ເງິນ ເປັນ​ຮອງ​ຜູ້ອຳນວຍການ​ໃຫຍ່;

 3) ຮັບຮອງການແຕ່ງ​ຕັ້ງ ທ່ານ ວົງ​ສະກຸນ ຍິ່ງ​ຍົງ ເປັນ​ຮອງ​ຜູ້ອຳນວຍການ​ໃຫຍ່

 4) ຮັບຮອງການແຕ່ງ​ຕັ້ງ ທ່ານ ນາງ ສຸກ​ສັນ ພົງ​ພິລາ ເປັນ​ຮອງ​ຜູ້ອຳນວຍການ​ໃຫຍ

 5) ຮັບຮອງການແຕ່ງ​ຕັ້ງ ທ່ານ ວັນ​ແສງ ວັນນະ​ວົງ ເປັນ​ຮອງ​ຜູ້ອຳນວຍການ​ໃຫຍ່ ສາຍ​ງານ​ການ​ເງິນ.

ແລະ ​ໃຫ້​ນໍາ​ສະ​ເໜີ​ເລື່ອງ​ດັ່ງກ່າວ​ຕໍ່​ກອງ​ປະຊຸມ​ວິສາມັນ​ຜູ້​ຖື​ຮຸ້ນ ຄັ້ງ​ທີ 1/2020 ​ເພື່ອ​ຮັບຮອງ.

 

2. ຮັບຮອງການແຕ່ງຕັ້ງຮອງປະທານສະພາບໍລິຫານ ​ແລະ ກຳມະການ​ສະພາ​ບໍລິຫານຜູ້​ໃໝ່ ​ເພື່ອ​ປ່ຽນ​ແທນ​ຜູ້​ເກົ່າ​ທີ່​ເຂົ້າ​ກະສຽນ​ບໍາ​ເນັດ, ການ​ກຳນົດ​ຜູ້​ທີ່​ມີອຳນາດ​ໃນ​ການ​ລົງ​ລາຍ​ເຊັນ​ຜູກ​ພັນ​ບໍລິສັດ ​ ແລະ ອາ​ຍຸ​ການ​ຂອງ​ບັນດາ​ກຳມະການ​ສະພາບໍລິຫານບໍລິສັດຄື:

    1) ແຕ່ງຕັ້ງທ່ານ ຈັນທະບູນ ສຸກອາລຸນ ຜູ້ວ່າການຜູ້ອຳນວຍການໃຫຍ່ລັດ​ວິ​ສາ​ຫະກິດ​ໄຟຟ້າ​ລາວ ເປັນຮອງປະທານສະພາບໍລິຫານ ເພື່ອປ່ຽນແທນຮອງປະທານສະພາບໍລິຫານຜູ້ເກົ່າ ທີ່​ເຂົ້າກະສຽນບໍາເນັດ.

​   2) ແຕ່ງ​ຕັ້ງທ່າ​ນ ດວງ​ສີ ພາຣະຍົກ ຜູ້ອຳນວຍການ​ໃຫຍ່​ບໍລິສັດ ຜະລິດ-​ໄຟຟ້າ​ລາວ ມະຫາຊົນ​ເປັນ​ກຳມະການ​ສະພາ​ບໍລິຫານ​ຜູ້​ໃໝ່ ເພື່ອປ່ຽນແທນກຳມະການ​ສະພາ​ບໍລິຫານ​ຜູ້​ເກົ່າ ທີ່​ເຂົ້າກະສຽນບໍາເນັດ.

​ກຳນົດຜູ້ມີອຳນາດ​ໃນ​ການ​ລົງ​ລາຍ​ເຊັນ​ສັນຍາຜູກ​ພັນບໍລິສັດດັ່ງນີ້:

ກ).  ໃຫ້ປະທານສະພາບໍລິຫານ, ຮອງປະທານສະພາບໍລິຫານ ຫລື ຜູ້ອຳນວຍການໃຫຍ່ ເປັນຜູ້ມີອຳນາດໃນການລົງລາຍເຊັນຜູກພັນບໍລິສັດ ປະທັບກາບໍລິສັດແຕ່ພຽງຜູ້ດຽວ ຫລື;

ຂ). ໃຫ້ກຳມະການທ່ານອື່ນ ສອງທ່ານລົງລາຍເຊັນຮ່ວມກັນ ແລະ ປະທັບກາບໍລິສັດ.

​ແລະ ກຳນົດອາຍຸການຂອງກຳມະການສະພາບໍລິຫານ​ທັງໝົດບໍ່​ເກີນສອງປີ  ໂດຍເລີ່ມນັບແຕ່ມື້​ກອງປະຊຸມວິ ສາມັນ​ຜູ້​ຖື​ຮຸ້ນ ຄັ້ງທີ 1/2020 ເປັນຕົ້ນໄປ ​ແລະ ​ໃຫ້​ນໍາ​ສະ​ເໜີ​ເລື່ອງ​ດັ່ງກ່າວ​ຕໍ່​ກອງ​ປະຊຸມ​ວິສາມັນ​ຜູ້​ຖື​ຮຸ້ນ ຄັ້ງ​ທີ 1/2020 ​ເພື່ອ​ຮັບຮອງ.

 

3) ຮັບຮອງ​ການ​ດັດ​ແກ້​ກົດ​ລະບຽບ​ ຂອງ​ບໍລິສັດ ມາດຕາ 9 ວ່າ​ດ້ວຍກຳມະການ ແລະ ມາດຕາ 12 ວ່າດ້ວຍສະພາບໍລິຫານ​ຄື:

        1) ດັດ​ແກ້ມາດ​ຕາ 9 ວ່າ​ດ້ວຍກຳມະການ: ປ່ຽນ​ຊື່ ​ແລະ ຂໍ້​ມູນ​ຂອງ​ກຳມະການສະພາ​ບໍລິຫານ.

        2) ດັດ​ແກ້​ມາດຕາ 12 ວ່າ​ດ້ວຍ​ສະພາ​ບໍລິຫານ: ປ່ຽນ​ຊື່ ​ແລະ ຂໍ້​ມູນ​ຂອງຮອງ​ປະທານສະພາ​ບໍລິຫານ.

ແລະ ​ໃຫ້​ນໍາ​ສະ​ເໜີ​ເລື່ອງ​ດັ່ງກ່າວ​ຕໍ່​ກອງ​ປະຊຸມ​ວິສາມັນ​ຜູ້​ຖື​ຮຸ້ນ ຄັ້ງ​ທີ 1/2020 ​ເພື່ອ​ຮັບຮອງ.

 

                   4. ກຳນົດວາລະ​ກອງ​ປະຊຸມວິສາມັນຜູ້ຖືຮຸ້ນ ຄັ້ງທີ 1/2020 ມີ​ດັ່ງ​ນີ້:

                                   ວາລະທີ 1:     ພິ​ຈາ​ລະ​ນາ ແລະ ຮັບ​ຮອງ​ບົດ​ບັນ​ທຶກກອງ​ປະ​ຊຸມສາ​ມັນ​ຜູ້​ຖື​ຮຸ້ນ ປະ​ຈຳ​ປີ 2019.

ວາລະທີ 2:     ພິ​ຈາ​ລະ​ນາ ແລະ ຮັບຮອງ​ການ​ແຕ່ງ​ຕັ້ງ​ຜ​ູ້ອຳ​ນວຍ​ການ​ໃຫຍ່​​ຜູ້​ໃໝ່ພ້ອມ​ດ້ວຍ​ຄະນະ ເພື່ອ​ປ່ຽນ​ແທນ​ຜູ້​ອຳ​ນວຍ​ການ​ໃຫຍ່ຜູ້ເກົ່າພ້ອມ​ດ້ວຍຄະນະ ​ທີ່​ເຂົ້າ​ກະ​ສຽນບຳ​ເນັດ.

ວາລະ​ທີ 3: ​    ພິ​ຈາ​ລະ​ນາ ແລະ ຮັບຮອງ​ການ​ແຕ່ງ​ຕັ້ງຮອງ​ປະ​ທານ​ສະ​ພາ​ບໍ​ລິ​ຫານ ແລະ ​ກຳ​ມະ​ການ​ສະ​ພາ​ບໍ​ລິ​ຫານ​ຜູ້ໃໝ່ ເພື່ອ​ປ່ຽນແທນ​ຜູ້​ເກົ່າ​ທີ່​ເຂົ້າ​ກະ​ສຽນ​ບຳ​ເນັດ, ການ​ກຳ​ນົດ​ຜູ້​ທີ່​ມີ​ອຳ​ນາດ​​ໃນ​ການລົງ​ລາຍ​ເຊັນ​ຜູກພັນບໍ​ລິ​ສັດ ​ແລະ ອາ​ຍຸ​ການ​ຂອງ​ບັນດາ​ກຳມະການ​ສະພາບໍລິຫານບໍລິສັດ

ວາ​ລະ​ທີ 4:     ​ພິ​ຈາ​ລະ​ນາ ແລະ ຮັບຮອງການ​ດັດແກ້​ກົດ​ລະ​ບຽບ​ຂອງ​ບໍ​ລິ​ສັດ​ມາດ​ຕາ 09 ວ່າ​ດ້ວຍ​ກຳມະການ ແລະ ມາດ​ຕາ 12 ວ່າ​ດ້ວຍ​ສະ​ພາ​ບໍ​ລິ​ຫານ.

 

​​ແລະ  (1) ມອບ​ອຳ​ນາດ​ໃຫ້​ຜູ້​ອຳ​ນວຍ​ການ​ໃຫຍ່ ຫຼື ບຸກ​ຄົນ​ທີ່​ໄດ້​ຮັບ​ມອບ​ໝາຍ​ຈາກ​ບຸກ​ຄົນ​ດັ່ງ​ກ່າວ  ເປັນ​ຜູ້​ມີ​ອຳ​ນາດ​ໃນ​ການ​ກຳ​ນົດ​ລາຍ​ລະ​ອຽດ ແລະ ເງື່ອນ​ໄຂ​ຕ່າງໆ​ທີ່​ຈຳ​ເປັນ ກ່ຽວ​ກັບ​ການ​ກະ​ກຽມ​ເປີດກອງ​ປະ​ຊຸມວິ​ສາ​ມັນ​ຜູ້​ຖື​ຮຸ້ນ ຄັ້ງ​ທີ 1/2020 ໄດ້​ທຸກ​ປະ​ການ, ລວມ​ທັງ​ໃຫ້​ມີ​ອຳ​ນາດ​ໃນ​ການ​ດຳ​ເນີນ​ການ​ໃດ​ໜຶ່ງ ອັນ​ຈຳ​ເປັນ ລວມ​ທັງ​ການ​ກະ​ກຽມ​ເອ​ກະ​ສານ​ຕ່າງໆ ແລະ ດຳ​ເນີນ​ການ​ໃຫ້​ຖືກ​ຕ້ອງ​ຕາມ​ລະ​ບຽບ​ການ ແລະ ກົດ​ໝາຍ​ທີ່​ກ່ຽວ​ຂ້ອງ; ​

ແລະ  (2) ​ແຕ່ງ​ຕັ້ງ ທ່ານ ຄໍາ​ແກ້ວ ວິ​ສີ​ສົມບັດ, ທ່ານ ນາງ ທະວີ​ຈັນ ທ່ຽງ​ເທບ​ວົງສາ ​ແລະ ທ່ານ ຮສ. ປອ. ພູ​ເພັດ ກ້ຽວ​ພິລາ​ວົງ ກຳມະການ​ອິດ​ສະຫຼະ ​ເປັນ​ຜູ້​ມອບ​ຮັບ​ສັນທະ​ຈາກ​ຜູ້​ຖືຮຸ້ນ.

 

    5) ກຳນົດວັນປະຊຸມ​ວິສາມັນ​ຜູ້​ຖື​ຮຸ້ນ​ ຄັ້ງ​ທີ 1/2020 ​ໃນ​ວັນ​ທີ 24 ກໍລະກົດ 2020 ​ເວ​ລາ 15:00 ​ໂມງ ທີ່​ຫ້ອງ​ປະຊຸມ​ຊັ້ນ 1, ອາຄານ​ສຳນັກງານ​ໃຫຍ່​ຂອງ​ລັດ​ວິ​ສາ​ຫະກິດ​ໄຟຟ້າ​ລາວ, ຖະໜົນ​ມິດຕະພາບ​ລາວ-​ໄທ, ບ້ານ​ທົ່ງ​ກາງ, ​ເມືອງ​ສີ​ສັດຕະ​ນາກ, ນະຄອນຫຼວງ​ວຽງ​ຈັນ. ແລະ ມອບອຳນາດໃຫ້ຜູ້ອຳນວຍການໃຫຍ່ ແລະ/ຫຼື ຜູ້ທີ່ໄດ້ຮັບມອບໝາຍຈາກຜູ້ອຳນວຍການໃຫຍ່ ເປັນຜູ້ມີອຳນາດພາຍໃຕ້ກົດໝາຍ ແລະ ລະບຽບການທີ່ກ່ຽວ ຂ້ອງໃນການແກ້ໄຂ ວັນ-ເວລາ ແລະ ສະຖານທີ່ກອງປະຊຸມວິສາມັນຜູ້ຖືຮຸ້ນ ຄັ້ງ​ທີ 1/2020.

 

 ດັ່ງນັ້ນ ຈຶ່ງຮຽນມາຍັງທ່ານເພື່ອຊາບ ແລະໃຊ້ຕາງລາຍງານ.

                                                                                                            ດ້ວຍຄວາມນັບຖືເປັນຢ່າງສູງ,

ກຳມະການສະພາບໍລິຫານ/ຜູ້ອຳນວຍການໃຫຍ່

 

 

              ລັດຕະນາ ປະທຸມວັນ